မြန်မာလူငယ်ဖွံ့ဖြိုးတိုးတက်ရေးအသင်း (MYDA) မှလူငယ်ရေးရာဝန်ကြီးဌာန၊ ပြည်ထောင်စုဝန်ကြီး ဒေါက်တာမောင်သင်းအား သွားရောက်ဂါရဝပြုတွေ့ဆုံခဲ့ခြင်း

၁၄ မေ ၊ ၂၀၂၆
နေပြည်တော်

မြန်မာလူငယ်ဖွံ့ဖြိုးတိုးတက်ရေးအသင်း (MYDA) (ဗဟို)ဥက္ကဋ္ဌ ဦးဇော်မျိုးအောင် သည် ယနေ့ နေ့လည် ၂ နာရီအချိန်ခန့်တွင် လူငယ်ရေးရာဝန်ကြီးဌာန ပြည်ထောင်စုဝန်ကြီး ဒေါက်တာ မောင်သင်းအား သွားရောက် ဂါရဝပြုတွေ့ဆုံခဲ့ပါသည်။

ထိုသို့တွေ့ဆုံရာတွင် မြန်မာလူငယ်ဖွံ့ဖြိုးတိုးတက်ရေးအသင်း (MYDA) (ဗဟို) ဥက္ကဋ္ဌ ဦးဇော်မျိုးအောင်မှ မြန်မာလူငယ်ဖွံ့ဖြိုးတိုးတက်ရေးအသင်းကြီး၏ ပြီးခဲ့သော (၈) နှစ်တာကာလ လူငယ်များ၏ ဗလငါးတန်ဖွံ့ဖြိုးတိုးတက်ရေးအတွက် သက်ဆိုင်ရာဝန်ကြီးဌာနအသီးသီနှင့် တိုင်းဒေသကြီးနှင့် ပြည်နယ်အစိုးရများနှင့် ပူးပေါင်းပါဝင်ဆောင်ရွက်ခဲ့သည့် အခြေအနေများအား ရှင်းလင်းတင်ပြခဲ့ပါသည်။

ဆက်လက်ပြီး ဥက္ကဋ္ဌ ဦးဇော်မျိုးအောင်မှ ၂၀၂၆ ခုနှစ်အတွက် အသင်းကြီးအနေဖြင့် လျာထားဆောင်ရွက်မည့် လုပ်ငန်းစဥ်များအားလည်း ပြည်ထောင်စုဝန်ကြီးထံသို့ အစီရင်ခံ တင်ပြခဲ့ပါသည်။ ဆွေးနွေးတင်ပြချက်များနှင့်စပ်လျဥ်းပြီး ပြည်ထောင်စုဝန်ကြီးမှဖြည့်စွက် အကြံပြုချက်များနှင့် ပူးပေါင်းဆောင်ရွက်နိုင်မည့်အခြေအနေများအားဆွေးနွေးခဲ့ပြီး လိုအပ် သည်များကို လမ်းညွှန်မှာကြားမှုများ ပြုလုပ်ခဲ့ပါသည်။

အဆိုပါတွေ့ဆုံပွဲအခမ်းအနားသို့ မြန်မာလူငယ်ဖွံ့ဖြိုးတိုးတက်ရေးအသင်း (MYDA) (ဗဟို) မှ အကြီးတန်းအကြံပေးအရာရှိ ဦးစည်သူ၊ အတွင်းရေးမှူး ဒေါ်ကြည်စင်ရွှေ၊ ဗဟိုအလုပ်အမှုဆောင် ဦးကျော်စွာမင်းသိန်း၊ မြန်မာလူငယ်ဖွံ့ဖြိုးတိုးတက်ရေးအသင်း(မန္တလေးတိုင်းဒေသကြီး) ဥက္ကဋ္ဌ ဦးဟန်ထွန်းဦး၊ မြန်မာလူငယ်ဖွံ့ဖြိုးတိုးတက်ရေးအသင်း(ရန်ကုန်တိုင်းဒေသကြီး) ဥက္ကဋ္ဌ ဦးခန့်မင်းသျှင်၊ တိုင်းအတွင်းရေးမှူး ဦးအောင်မင်းပိုင်၊ တိုင်းဘဏ္ဍာရေးမှူး ဦးသူမြတ်ထွန်း တို့လည်းပါဝင် တက်ရောက်ခဲ့ကြပါသည်။